१५ असोज, बारा। आज बडा दसैँको पहिलो दिन अर्थात् घटस्थापनाका दिन घर-घरमा र शक्तिपीठहरूमा विधिपूर्वक पूजा-आराधनाको थालनी गरिँदै छ। पूजा सुरु गर्नुअघि बिहानै उठेर स्नान गरी पूजा कोठा वा मण्डपलाई सफा र शुद्ध पारिन्छ। त्यसपछि पूर्व वा उत्तर फर्केर पूजाको संकल्प गरिन्छ र गाईको गोबरले लिपेर शुद्ध पारिएको स्थानमा माटो वा बालुवा बिछ्याइन्छ।

दोस्रो चरणमा विधिपूर्वक घटस्थापना र जमरा राख्ने कार्य गरिन्छ। माटो वा बालुवाको वेदीमा शुद्ध जो-तिल (जौ र तिल) छरिन्छ। त्यसपछि तामा वा माटोको कलशमा जल भरिन्छ र त्यसमा पञ्चपल्लव, सुपारी, सिक्का र अक्षता हालेर मुखमा नरिवल वा तामाको कचौरा राखी कलश स्थापना गरिन्छ। सोही कलशलाई नै दुर्गा माताको साक्षात स्वरूप मानेर दीप प्रज्ज्वलन गरिन्छ।

तेस्रो चरणमा नवरात्रकी प्रथम देवी माता शैलपुत्रीको ध्यान र आवाहन गरिन्छ। दाहिने हातमा त्रिशूल र देब्रे हातमा कमलको फूल लिएकी, साँढेमा सवार देवी शैलपुत्रीको ध्यान गर्दै फूल, अक्षता, चन्दन, र अबिर अर्पण गरिन्छ। उहाँलाई विशेष गरी सेतो र पहेंलो रङका फूल तथा वस्त्र प्रिय मानिने भएकाले सोहीअनुसार पहिरन वा श्रृङ्गारका सामग्री चढाइन्छ।

अन्तिम चरणमा माता शैलपुत्रीलाई भोग अर्पण, आरती र मन्त्र जप गरिन्छ। घिउ वा घिउबाट बनेका मिष्ठान्न भोगका रूपमा अर्पण गरी ‘ॐ देवी शैलपुत्र्यै नमः’ मन्त्रको यथाशक्य जप गरिन्छ। अन्त्यमा धूप-दीप बालेर देवीको भावपूर्ण आरती गरिन्छ र सबै परिवारजनमा प्रसाद वितरण गर्दै पूजा सम्पन्न गरिन्छ।